هنتكلم الفترة دي عن التغذية للطفل حديث الولادة ،وهنبدأ بالرضاعة والرضاعة ليها 3 أشكال أساسية :

1) الرضاعة الطبيعية

2) الرضاعة الصناعية

3) المزيج بين الرضاعة الطبيعية والصناعي

طب ازاى اعرف ان ابني جعان؟؟؟ *

العياط هو اكتر مؤشر للجوع ولكن قبل العياط هانلاحظ البيبي بيمصمص صوابعه أو بيحرك رأسه من ناحية للتانية

معدل الرضاعة الطبيعي للطفل هو رضعة كل ساعتين لـ 3 ساعات بعض الاطفال ممكن تقعد لـ 4 ساعات بالذات لو الرضاعة صناعية، لانها بتاخد وقت أطول عشان تتهضم، وده بيختلف من طفل لآخر وهنعرف ساعتها امتى هو جعان من المؤشرات السابقة و ساعتها هانرضعه.

بشكل عام الرضاعة الطبيعية من الحاجات اللي بنحاول نشجع الأمهات عليها لأن الأم لما بترضع طبيعي ده بيوصل لابنها : أجسام مضادة بيقدر بيها يتغلب على إلتهابات معينة، أكثرها درست في العلم الحديث زي التهابات الأذن, والتهابات المعدة والأمعاء الي هي (النزلة المعوية ), وكمان التهابات التنفس (زى البرد والتهابات رئوية),و الحساسية زي(حساسية الأكل بالذات ) الرضاعة الطبيعية بتحل وتعالج كل المشاكل دي 

والجدير بالذكر انها كمان بـ تقي الأم من مشاكل كتير يعني الأم اللي بترضع طبيعي :بتقدر تحافظ على وزنها اكتر، وكمان بطنها عادة بترجع للشكل الطبيعي.

الدراسات اثبتت ان الستات اللي بترضع طبيعي ولمدة أطول بتكون أقل عرضة للإصابة بسرطان الثدي،عن اللي بترضع فترة بسيطة أو الست اللي مش بترضع خالص وده مفيد للأم والطفل.

في البداية اول كام يوم من الرضاعة بتنزل مادة لزجة من الثدي اسمها لبأ النفاس (كولوستروم) وده بـ يطلق عليه الذهب السائل وده لأن القطرة الواحدة منه بـ تحتوي على 7 مليون جسم مضاد بيساعد الجسم الرضيع أن مناعته تتحسن.

في امهات بتقول هو يعني الكام نقطة دول مهمين لأبني؟؟ ولكن فعلا هما مهمين عشان احتياجات الطفل في الكام يوم دول بتكون بسيطة و بيكون نايم معظم الوقت فـ النقطة والنقطتين دول بيكونوا كفاية في اليومين دول.

في اليوم الثالث أو الرابع الست بيبتدي اللبن بتاعها ينزل ساعتها بتحس احساس تقيل في الثدي، وكمان ممكن تحس بآلام في بعض الأحيان لو الطفل مش بيرضع بشكل مستمر ممكن انها تحس برعشة وافضل حاجة تعملها تحاول انها تفضي الثدي عن طريق انها تستخدم الشفاطة الي بتطلع اللبن بحيث انه مايبقاش تقيل ومؤلم بالنسبة لها بأنها ترضعه لو الطفل نايم ومش قادر يرضع.

 والماء الساخن بـ يساعد اللبن يطلع زيادة أو ممكن تستخدم تلج على المناطق المؤلمة في الثدي أو المسكنات زي البروفين، ممكن انها تقلل من الألم اللي بيساعد على الأعراض زي الرعشة.

بداية من أول أسبوعين الثلاثة اللبن بيكون لسة بيتظبط، سعتها الجسم بيكون لسة بيشوف الطفل بيرضع أد ايه عشان يجهز اللبن إلي الطفل هيرضعه.

وساعات كتير اوي اللبن يكون قليل شوية في الحالة دي ننصح الأم انها تحط البيبي على صدرها اطول وقت ممكن، لان هو بيطلب لبن أكتر فكل ما يرضع اكتر كل ما الجسم بيعمل لبن أكتر ,فـ لو اللبن كتير زيادة عن اللزوم سعتها بيكون مزعج للسيدة لان ساعتها اللبن بيظهر في الملابس، وحاليا متوفر منتجات بتتباع بتتحط جوه الملابس الداخلية عشان تمتص اللبن الزيادة، وبكدة نحب نطمنها أنها بعد أسبوعين تلاتة اللبن بيتظبط في الجسم واللبن الزيادة مش هيبدأ يطلع بكميات كبيرة تاني.