نوم الرضيع 

 معدل النوم الطبيعي للطفل حديث الولادة بينام 20 ساعة بيصحى يرضع ويرجع ينام تاني ،في الوقت اللي بعد كده بيبدأ أنه بعد الرضاعة يصحى أكتر أو يلعب شوية و بيصحى فترة أطول ،بعد 3 شهور بيبتدي تركيز النوم في فترة الليل أكتر من فترة النهار وده الشكل الطبيعي.

المغص الوليدي:
ظاهرة بتصيب الطفل حديث الولادة حوالي الأسبوع الثالث من الولادة وممكن تستمر لحد الشهر التالت وأثبت العلم الحديث أن المغص الوليدي ظاهرة عاطفية أكثر منها ظاهرة جسدية فعشان كدة أدوية الغازات والأعشاب مش بتعالج المغص

وفي فترة المغص ده الطفل ممكن يكون عصبي وبيعيط جامد بالليل وممكن يكون مالوش أي سبب للعياط بأنه واكل كويس و مغير الحفاضة ومفيش حرارة ولكنه برضه مش مرتاح, من الحاجات اللي بتهدي الطفل في الوقت ده هو التهدئة العاطفية في حضن الأم أو الأب وانه يكون ملفوف بطريقة محكمة او الغناء او الهز الخفيف جدا ومفيش ضرر من شيل الطفل في المرحلة دي بالعكس هو بيكون في احتياج لـ حنان وعاطفة الأم.

لو الطفل مش بينام لوحده بطبيعته تقدري تساعديه بأنه ينام مثلا بإنه بالليل نحاول نطفي الأنوار ونخلي الجو هادي ومناسب للنوم نحاول نعوده على روتين ما قبل النوم الروتين ده ممكن يكون قراءة قصة او غنوة أو هز بسيط او اى حاجة الاهل بيحبه يعملوها ترتبط بالنوم .

لو الطفل صحي قبل النوم بيكون بيصحى عشان يرضع لأن بطنه صغيرة فـ بيجوع بسرعة فـ بيصحي يرضع لكن لما بيكبر شوية بطنه بتكبر وتخليه يرضع اكتر فبيكون عنده لبن اكتر يخليه ينام لمدة 4 ساعات وساعات بيصحى مش لأنه جعان ولكن عشان هو بيكون صحي فنحاول نطبطب عليه ونطفي الأنوار ونهدي الجو عشان يرجع ينام .

لو في مشاكل أكثر في النوم ما بعد ال 6 شهور ولسة مستمرة فمن الأفضل متابعة الطبيب المعالج لأن ممكن عدم النوم المنتظم يكون ناتج عن مشاكل تانية.