ازاي اعرف ان الطفل اخذ كفاية في الرضاعة؟

السؤال اللي دايما بتسأله بخصوص الرضاعة وده بيميز الرضاعة الطبيعية عن الرضاعة الصناعية لأن في الرضاعة الطبيعية احنا بيبقى مش عندنا فكرة هو أن الطفل رضع أد ايه فالسؤال اللي بـ يتسأل كتير ازاى اعرف ان الطفل أخد كفايته من اللبن في الرضاعة.

المعدل الطبيعي للرضاعة

المعدل الطبيعي للرضاعة الطبيعية هو ما بين كل ساعتين ل 4 ساعات الطفل بـ يرضع لمدة نص ساعة ل 40 دقيقة حوالي 10 ل 20 دقيقة في كل ناحية.

المؤشر الأول في أن الطفل و اخد كفايته هو التبول في اليوم 5 ل 6 مرات فزي ماتكلمنا في المحاضرة اللي فاتت انه هو بيطلع بول تقريبا كل 3 او 4 ساعات بشكل طبيعي. وبرضو بالنسبه للخروج ميبقاش عنده إمساك

وطبعا بيبقى أهدى لأنه لما بيرضع بيهدى كل دي مؤشرات انه اخذ كفايته من اللبن.
مؤشرات تانية هو النمو بانه بيكبر فالدكتور اللي هو بـ يباشره بيشوف ان هو بيكبر و بنلاحظ انه كبر على لبسه فدي برضو مؤشرات بإنه واخد كفايته من اللبن .

كل ما اللبن يتسحب اكتر كل ما الانسداد ده يبتدى يفك وطبعا الحمام السخن بيساعد ان اللبن في صدرها يفك والأدوية اللي زي البروفين برضو ممكن تقلل من الاحتقان في القنوات دي .

رعاية حلمة الثدي

نتكلم شوية عن رعاية حلمة الثدى برضو لأن دي حاجة من الحاجات اللي بتخلي الستات تتعب أوي من الرضاعة وقد لا تكمل في الرضاعة بسبب المشاكل في الحلمة دي،
الحرقان في الحلمة من الحاجات اللي بتحصل كتير للستات اللي بترضع والتعامل معها بيكون سهل أوي وبيكون في كريمات مخصصة للحملة بتحتوي على مادة اللانولين اللي بـ ترطب الحلمة .

الحاجة التانية اللي بننصح بيها الامهات انها تتطلع شوية لبن من صدرها وتدهنه على الحلمة لأن الزيوت الطبيعية اللى داخل اللبن بتساعد على التئام الحلمة لو فيها أى مشكلة .

متى تستشير الدكتور؟

مهم اوى نعرف ايه هى المشكلة اللي لو موجودة نستشير فيها الدكتور الحرقان العادي بتاع الحلمة منتشر ان هو يكون بيحرق في أول دقيقة او دقيقتين انما بيخف لما الطفل بيبدأ يرضع  انما لما الحرقان مش بيخف اللي بيسموها الحلمة المتشققة ودي وجعها فظيع ومن الأخطاء الشائعة ان الست لما بيجيلها الحرقان ده بتبطل ترضع من الثدي ده وده بيخلي الألم بيزيد اكتر وحل المشكلة دي هي أخذ مسكنات الآمنة في الفترة دي ,وتاني حل ان هى تستمر في الرضاعة مع مراعاة الحاجات اللي قولناها للتعامل مع الحلمة المؤلمة .

السؤال التاني برضو ان ستات كتير بتكون عندها مشكلة ان الحلمة بتكون منكمشة أو مبططة فستات كتير بتسأل هل أعرف ارضع طبيعي ولا لا ؟
طبعا الست اللي عندها حلمة مبططة دا مش بيأثر على الرضاعة خالص الرضيع بيشد الحلمة و بيخليها تطلع حتى لو كانت مبططة قبل الرضاعة وبعد الرضاعة بتبتدي تبقى بارزة أكثر في أمريكا بيبيعوا حاجات قد تكون مش منتشرة أوي في العالم العربي بس بيسموها غطاء الحلمة ودي بتساعد الحلمة انها تطلع برا.

والمشكلة التانية اللي ممكن تحصل هي مشكلة خطيرة جدا وهي انسداد في القنوات اللبنية اللي بيحصل ان القنوات اللبنية عامة بيجري فيها اللبن بشكل طبيعي لما بيحصل جفاف او لو الست ماشربتش مياه كفاية أو لو الطفل مارضعش كفاية ممكن اللبن يتكتل والقناة دي تتسد وبتبقى أعراضها ان في حتة متحجرة من الثدي و بتكون مؤلمة جدا جدا والتعامل معاها بيبقى برضو شرب مياه كتير

الانسداد في القنوات دى انها ممكن بعد الشر أنها تؤدي إلى التهاب في الثدي وده لازم نكون مركزين معاه أوي لأن أعراضه بتكون نفس المنطقة المتحجرة دي فيها احمرار وممكن بعد الاحمرار تلاقي تحجر في الثدي وآلام في الجسد شديدة وممكن حرارة شديدة ورعشة في الجسم.

الالتهاب من النوع ده ممكن يوصل للدم بشكل سريع  مهم جدا انك لو لاحظتي أي من الأعراض دي لازم تراجعي مع طبيبك المعالج لأن لو حصلت لازم بالضرورة الست تاخد مضادات حيوية عشان الالتهاب يخف وطبعا زي ماقولنا لازم تستمر في الرضاعة وماتوقفهاش لأن الرضاعة بتساعد على مجرى اللبن والدم في المنطقة .

ايه خصائص اللبن اللي بيطلع من ثدي الأم وازاى نقدر نطلعه بحيث انه يستخدم في وقت آخر لو الست راحت الشغل عشان نعرف الاجابات على الأسئلة دي تابعوني في المحاضرة الجاية.