الرضاعة الطبيعية والأم العاملة

ازاي نقدر نعطي الرضيع لبن الأم في وقت آخر

في الفقرة اللي جاية دي هنتكلم عن شوية عن اللبن وازاي نستخرجه من الأم بحيث نقدر نديه للرضيع في وقت آخر والموضوع ده مهم خاصة لو الأم عاملة وبعد فترة هـ ترجع الشغل فطبعا الموضوع دة بيتعمل عن طريق الشفاطة وطبعا في انواع مختلفة من الشفاطات من أهم الشفاطات اليدوية اللي بتتعمل بالايد ودي ممكن نستعملها لو استعملها خفيف.

بس عادة الأم اللي بتشتغل ومحتاجة تطلع لبن أسرع بـ انصحها تجيب الشفاطة الكهربية اللي بتشتغل بالكهربا طبعا شفط اللبن بيحصل اثناء ما بتكون الأم في الشغل وقبل ما بنعمل عملية الشفط دي لازم نتأكد ان كل حاجة تكون نظيفة مغسولة بمياه سخنة وصابون والأم تكون غاسلة ايدها كويس وفي حاجات ومنتجات كتير ممكن تستخدم بس الفكرة هي واحدة هي شفط اللبن وتخزينه لحد ماترجع لطفلها الرضيع و بيتحوش لتاني يوم في الوقت اللي بتكون فيه مش مع طفلها الرضيع.

أول حاجة اللبن المستخرج ده بيكون لونه غريب شوية بعض الأحيان بيختلف على حسب أكل الأم فـ الستات كتير بيسألوني ان مثلا لبنها لونه أزرق أو أخضر طبعا مش اخضر فسفوري بس بيبقى لونه مخضر شوية أو مزرق شوية نحب نقولك ان ده طبيعي وعادي جدا.
اللبن برضو عادة بيكون فيه طبقة من الدهون كدا من فوق دا برضو بيكون طبيعي جدا ومافيش قلق منه و بيختلف حسب أكل أم.

دلوقتي بعد استخراج اللبن في عملية تخزينه في غرفة حرارتها معتدلة ماتكونش حر أوي لمدة 4 ساعات مش أكتر من كدا لأن اكتر من كدا بيبتدي يبوظ و يبتدي يقطع زي اللبن البقري ويبتدي يبقى حامض وتبقى ريحته مش لطيفة ممكن يقعد في ايس ياج أو لانش بوكس فيه تلج لمدة 24 ساعة ،احتفظي بيه لوقت أطول في الفريزر

فلو انتي بتشتغلي و عاوزة ابنك يكمل يومه كله من اللبن فممكن تخزينيه في الأيس باج ده لمدة 24 ساعة أول لما توصلي ومش هـ يتعطى للطفل على طول وفي الأغلب انه مش بياخد اللبن اول لما توصلي فـ ممكن تشيليه في التلاجة لمدة 5 أيام لو مديناهوش للطفل في مدة 5 أيام ممكن نحطه في الفريزر وفي الفريزر ممكن هو يعيش فترة أطول بس ميتحطش في الباب نفس الشئ في الثلاجة ميتحطش في الباب لأن درجة حرارة الباب بتكون أعلى من جوا التلاجة يتحط في ظهر الثلاجة.

دلوقتي بالنسبة للبن اللي اتخزن لو انا عاوزة أديه للطفل لازم ادفيه شوية دا موضوع جدير بالمناقشة لأن تدفئة اللبن في الميكرويف ليست صحيحة مع ان في ناس بيعملوها لكنها غير صحيحة لأن الميكرويف بيسخن اللبن بشكل مش صحيح بعض الأماكن بتسخن اوي فـ ممكن يتم تغير المواد الكيميائية في اللبن وبعض أماكن الثانية في اللبن بتبقى لسة مبتدفاش فـ ممكن لو اديناه للطفل يحرق بقه وبرضو بـ يؤثر على نوعية المواد والأجسام المضادة الموجودة في اللبن.

تسخين اللبن تحت حنفية مياه دافئة ،تسخين اللبن بيكون أحسن تحت حنفية مياه دافية أو في حمام ماء دافئ وطبعا بنجربه على ايدنا قبل مانديه للطفل نتأكد بإنه مش سخن أوي ولا أنه هو ساقع أوي.

بالنسبة لتخزين اللبن لمدة شهور في ظهر الفريزر دا عادة رغم اننا نقدر نعمله لكن مش بنصح بيه لأن أولا احتياجات الطفل في الشهر الأول بتختلف عن احتياجه في الشهر التالي فالأحسن اننا نستخدم اللبن ده أول بأول .

الحاجة التانية في بعض الأحيان زي ماقولنا تبريد اللبن وتسخينه ممكن يغير التركيبة الكيميائية لدى البروتينات اللي في اللبن والأجسام المضادة فبرضو كل مانحرص انه يكون طازج أكتر كل مايكون أحسن بس طبعا لو الست مضطرة مفيش أي ضرر.

الحاجة التانية المهمة اللي احنا نقولها ان الفيتامينات يعني مثلا الفيتامين سي بيتكسر في اللبن بشكل سريع جدا فطبعا أحسن حاجة لو قدرنا ندية للطفل طازة يوم بيومه لكن لو اضطررنا مافيش أي مشكلة.